熱礱

  日本時代 ê 台灣讀冊人按怎學會曉華語文？其實就是靠漢字去接，華文佮漢文嘛是八十pha sio-siāng，看久自然看有，tō 算汝毋bat 北京話。台語文嘛仝款道理，雖然唸起來差真濟，靠漢字tsih-tsiap，其實無 hiah歹理解，tsit个觀念華語我 kā 號做「漢字橋接」。 世間 ê 現象真濟 beh-kâng-á beh-kâng。 汝講華語佮台語文法真成，講成嘛成，講無成嘛成。英語我愛汝是 I love you，字 ê 編排佮中文攏仝款，攏是我-愛-汝，其實汝嘛會使寫「我愛你」，唸做 I love you。寫做中文，唸做台語，道理 tō 按呢爾。無，像台語查甫、查某，你中文 beh 按怎寫？男、女？看著「男」唸做「查甫」佮看著「男」唸做 man 到底佗位無仝？毋過汝絕對毋敢按呢做，會 hông 笑死。 台語當然是比英語 koh-khah 成華語，毋過無可能 siánn-mih 攏照搬。寫做中文唸做台語，hit款「台語」定定就是翻譯腔，雖然嘛是聽有，總是，無 hiah tsiànn-pān。

  真濟人有一个誤解，想講像國語運動按呢強sak，英語就普及--ah。 上好是有 tsiah簡單。咱 ài 有一个「仁」（core） ê 概念。至少 ài 有一个社會抑是社區（community ），內底日常生活 tō 是攏用某mih 語言，一个語言 tsiah有可能佇在地生根。若是靠個人智慧天份，ke-ke 是真少數人有法度家己突破。 國語運動會成功，第一、伊是唯一 ê 官方語言，予汝閃避袂過。第二、伊有語言社群存在，就是我頂頭講 ê 「仁」。兩个條件 ài 仝時有，tsiah sak會成功。 若靠個人努力就會行，本土語言 ê 復興運動就袂 sak kah tsiah食力--ah

我按呢感覺，真正有問題是華語霸權，毋是華語，tō 親像雙語國家毋是問題，問題是內底無本土語言 ê 角色。清除華語霸權毋是一定 ài 禁華語，或者是用英語去取代華語 ê 懸位。 真正 ài 改變 ê 觀念是「華語才是中性 ê 語言，高級 ê 語言」。 所以，我並無認為一定 ài kā 華語 siah kah 無去 tsiah 有法度救台語。我印象上深是 khah早聽一táu 法語課，hit个課內底有同學是阿拉伯語系 ê 學生，伊暑假去阿爾及利亞上阿拉伯語學校，結果發現阿爾及利亞人攏咧講法國話，伊感覺足譀，按呢我來 tsia 學 siánn-mih 阿拉伯話？？ 毋過實際上，阿爾及利亞 in kàu 落尾阿拉伯語照常通行，並無去予法國話吞去。 有一寡台灣人 ê 問題毋是講華語，是干焦講華語。只要做 kah 有一工有人講一種本土語言，現場無人直接 phiann出：「請說國語。」按呢本土語言復興 tō 成功一半--ah。

  前工有人講，華語恁都毋放，按呢 beh 按怎救本土語言？tsit个問題確實足困難，kám 講 beh 放就會當放？？ 目前已經受過華語教育，抑是 tng 咧受華語教育 ê 人，tsit世人絕對無可能 kā 華語放掉，除非汝騙家己。所以放毋放，對目前已經受教育 ê 人是一个假議題。若 beh講放毋放是對未來受教育 ê 人有意義，毋過因為真濟囡仔猶未去學校讀冊進前，厝內就已經做華語家庭教育，所以 tsia ê 囡仔嘛無可能放--ah。 佇 tsit-má tsit个現實中，本土語言 beh 復興 ê 背景就是華語存在 ê 環境，無 hit-lō 先 kā 華語 tok掉 tsiah 來創 siánn 創 siánn ê 可能。 今仔早起看著美國人崔璀璨就是進前講 in 老師全部講台語，害伊聽無 ê hit个YouTuber，竟然做一支講台語 ê 片。風 ta̍uh-ta̍uh-á 吹，吹久天氣嘛開始無 hiah熱。 意識若改變，觀念若改變，代誌 ta̍uh-ta̍uh-á 會無仝，咱嘛干焦會使做 kah 按呢。一切攏是台灣人共同 ê 選擇，我干焦一票，我已經投--ah，就按呢。

今仔日討論著「跑」 tsit字佇台語用真少，基本上干焦文讀會出現，「落跑」 ê 跑嘛毋是台語讀音，是對華語借音。 「走」是真古早 ê 詞，春秋戰國就有 tsit个字，用法就是 tsit-má 「走」 ê 意思，顛倒是佇華語前身——官話失去「走」 ê 意思， 變做「行」 ê 意思。 按呢「跑」 tsit字對佗來？ 照辭典 ê 解sueh，東漢‧魏晉時代開始有 tsit字，是講許慎是東漢 ê 人，《說文解字》無收 tsit字，可能 kah 晉朝 khah確定有 tsit字，毋過伊原本意思是動物掘地。是按怎去變做「走」 ê 意思煞毋知。 查起來 ká-ná kàu 元朝以來，跑 tsiah 有走 ê 意思。按呢 kám 會是蒙古語 ê 影響？ 毋過，蒙古語 ê 走是 гүйх（güikh） kap ㄆㄠˇ完全無成，所以到底「跑」變走是按怎來--ê？ 確實真歹稽考，除去蒙古語，閣來 khah有可能是女真語（金朝） ê 影響，毋過女真語我 tō 真正毋知按怎去查--ah。

  我有朋友真正煩惱注預防射，五冬十冬了後，會有想袂 kàu ê 狀況。我袂講 tsia 反疫苗派 ê 想法絕對毋著，注預防射了後，我 ê 身體真正有明顯 ê 無仝。 影響是一個月、兩個月，五冬十冬，確實攏有可能。是講若無注去著著，可能 tō 無 siánn-mih 五冬十冬。 進前同事咧討論，我講，我無 beh 選預防射 ê 想法真簡單，汝專工研究，結果若證明汝選毋著，kám 袂愈厭氣？不如順運命安排，按呢就算結果無好嘛 khah 袂 hiah 艱苦。選規半工，閣選毋著，tsiah是慘。 注預防射會按怎樣，總是全世界注 ê 人 hiah濟，有代誌，汝嘛袂孤單。 咱人自出世，就拄著一堆歹mi̍h-á，最近幾冬，我定定聽相bat ê 人著癌，有 ê 人閣是特別顧身體，有--ê 嘛 tsia̍p 運動，結果真少年就離開世間，按怎防？ 食愈老愈感覺一切攏命，無法度 siunn 計較，看汝偌gâu 算，無值天一劃。 開 khah開--ê，注預防針本底主要就毋是為家己，為著逐个早日 tńg去正常 ê 生活，賭嘛就 ài 佮伊賭--ah。

 真久以前，有一个出版社 ê 朋友 kā 我封鎖，我一直想無原因，今仔日 ká-ná 知影 ê 款。Hit時我為著揣理由佮伊 káng，定定會 kā 講我佇汝編 ê bóo-mih 冊頂懸看著佗一字印毋著，伊嘛攏足客氣 seh-to-siā，有一工伊雄雄 kā 我刣掉，hōo 我發現著，我講到底我怎樣得罪汝？我會記得一個月嘛 tsiah 私訊汝一改爾。按呢 kám 有過份攪擾？結果，汝連 kái-seh 攏無，一句嘛無應，直接 kā 我封鎖。 想想咧，我真正白目，伊一定足驕傲家己 ê 專業，結果我一本冊內底 tō 指出伊至少三、四个字毋著，伊一定忍真久--ah。 定定有人袂爽台文糾察隊，kā 叫做台羅戰士，我想佮我 khah早 bat ê hit个朋友應該是仝款心理，雖然 hit个朋友可能是一時 tshuh目，毋是真正 m̄-bat，毋過予人不時指正，會起毛bái 嘛算正常。 後來我看著華星文嘛真少指正，應該是攏無咧指正，公家機關寫毋著字，我感覺 khah嚴重，一般人伊應該嘛知影家己烏白亂寫，四秀食會用得，拍電動會用得，正頓會記食，功課會寫，按呢 tō 好--ah，咱都毋是對岸 hit國--kóng。尤其面冊基本上就是寫廢文 ê 所在，一直咧批改廢文，寫廢文 ê 心情嘛規个害去，佮面冊 tsit-má 押佇我後壁，隨時 beh kā 我 phut 仝款，予人真正感覺蓋袂爽快。