熱礱

知iáⁿ 日本明治維新有一陣志士信仰基督教了後，想tio̍h 韓國現此時 mā tng-leh 基督教化，án-ne 全世界 ê 現代化國家，kan-ta tshun 台灣是唯一 m̄-bat 基督教化--ê，m̄-koh bô-tiāⁿ ū-lâng ē 認為台灣根本 iá-bē 現代化。 台灣到底是怎樣情形，lán 先 khǹg 一爿。準講基督教化 kap 現代化確實有關係，tse 其中是 siáⁿ-mih 原理？ Lán 知iáⁿ 現代化有幾个特徵，第一是精準時間觀，第二是可計算性，第三是計劃性。基本上，全部加起來，ē-sái 用「合理性」來概括。若 beh 精確解說，現代社會時間是有限、有價，時間本身 ē 產生價值，所以時間 ài 儉儉á 用，ài 計算過，ài 做計劃，將 lâng 一生 ê 時間好好利用。Tsit 種精神貫徹落去，tō 變做 Max Weber kóng--ê，資本主義社會，伊 tō 認為資本主義是因為新教倫理所造成。 Lán ē-sái 用佛教來對照，若汝是佛教徒，因為輪迴 ê 關係，汝 m̄-nā tsit生，汝有千千萬萬个人生，等於講汝 ê 時間是無限--ê，所以無理由 kap 時間當做有限、有價，bô需要時時計較。 若汝是伊斯蘭教徒，in ê 教主本底是生理lâng，加上 in mā是 bô輪迴觀，照理講，kap 基督教足 sîng。m̄-koh tī 現代化 ê 路程一直行了比東亞 koh-khah tîng-tâⁿ。政教合一是其中問題，m̄-koh tú開始 ê 時，基督教國家 mā kâng款有政教衝突 ê 問題，精差基督教教會 kap 國家是兩套制度，tsit點伊斯蘭國家 khah bô-kâng，in ê 教會 kap 國家分bē 出來，當初穆罕默德本身 tō是伊斯蘭國家 ê 元首，bô 像基督教是「恁著將該撒 ê mi̍h 納 hō͘ 該撒；將上帝 ê mi̍h 納 hō͘ 上帝」。 所以講，基督教將信仰 ê 事 kap 世俗 ê tāi-tsì 分開 mā 有利現代化，因為若信仰 kap 世俗 lām 做伙，二个目標會衝突，án-ne tō bô-huat-tō͘ 計算。 雖然 lán bô-huat-tō͘  kóng 現代化一定 ài 先基督教化，m̄-koh...

最近小可了解 tsiah 知iáⁿ 七字仔真正是台語文化 ê 芯。 七字仔做四句，tō 四句聯，七字仔做一大pho tō 變歌仔，用唸--ê 叫唸歌，歌仔加戲變歌仔戲。 千變萬化攏 tse 七字仔去變。 為怎樣是七字，m̄是五字？ Tse 道理 kàu taⁿ 我 koh 猶無了解，我知iáⁿ--ê 是日本是五七五，越南是六八，漢文有五絕七絕五律七律，詩經是四字，為怎樣台語七字獨霸，應該有語音學頂kuân ê 原理作用。 我是感覺若 kan-na 五字，寫出來 tō siuⁿ文言，所以五字足歹流行，九字 koh 有 khah長。 M̄-koh，雖然是七字，kap 唐詩 ê 七字無仝，無講究平仄，kan-ta 尾字有寡規則，而且 mā 無強求，koh 一點是 ta̍k字攏 ài 押韻。 我個人是 khah 無佮意 ta̍k句字數仝款，m̄-koh tse 是台語原始歌詩 ê 基本型，beh 變khiàu mā ài 先研究伊。

暗，騎車 tī 國中時 ta̍k-kang 經過 ê 路，khah早 ê 記持一時 lóng tńg--來。 離開高雄真久真久，tńg來 tiāⁿ-tiāⁿ kui-kang khut leh tshù。今á暗，我 tsiah koh lia̍h-tio̍h hit-ê 感覺，感覺 tsia 是故鄉，真久真久以前 hit種親近，tàng tsit暗 tshuē tò-tńg-lâi。 我一直足 kah-ì 高雄 hit款清爽，樓á-tshù bô像台北 hiah-nī-á lap-sap，bē ū 烏色水痕。路闊車少，心情 ē-sái kài輕鬆，薄淡á 庄腳氣味。 Tsit-má 想起來，khah早高雄 lâng 可能 tō bô-tsē，可能去台北 siuⁿ久，錯覺高雄 lâng ná-ē 變 hiah少，古早市區 bô tsit-má 闊，kâng款人數 iā落去，當然看起來 ē koh khah-khang。 Tú kàu 台北 ê 時，感覺台北 lâng tshah-tshah-tshah，久來 suah bô感覺--ah。其實，台北 lâng kâng款 tsē，bô-tiāⁿ 比以前 koh khah-tsē，m̄-koh，我已經習慣--ah，有時 koh ē 感覺台北 ká-ná lâng bô夠 tsē。 Lâng 少應該 khah好，心 ē khah定。故鄉總是故鄉，ū 鄉 ê 形 khah好。