熱礱

昨昏去聽長松學長佮順聰 ê 座談，長松學長講著伊為著 beh 描寫小說中主角 ê 面模仔，甚至專工去學素描佮化粧術。有夠拄好 ê 拄好，我今仔日早起讀三島由紀夫 ê 冊，伊嘛拄好咧講面模仔按怎描寫。 「法國古典文學 bat 有『肖像』 tsit款文學 ê 分類，in 用簡單 ê 筆法huê出各人 ê 風采佮性格，佇 sa-lóng 會提供消遣 ê 仝一時，嘛用伊來比評觀察佮批評 ê 目尾力，Bruyère ê 《人性佮世態》（Les Caractères ou les Mœurs de ce siècle），會使算是 tsit款文類 ê 經典。」 我毋bat 想過主角 ê 面模仔對小說家 tsiah重要。因為我平常時 tō 無 hiah 注意人生做按怎，所以真正袂想著外型 tsiah 重要。亞里斯多德認為創作上重要是情節，若靠主角外型可憐來求得觀眾同情，tse 是毋tsiânn步，按呢看起來，我 ê 頭殼自頭 kàu 尾真正是古典派。 三島由紀夫閣講：「文學作品內 ê 人物描寫無法度像電影 án-ne 直接展現視覺方面 ê 印象，tō án-ne 讀者 ê 想像力 tsiah會十分重要。」我自頭就是按呢想，所以根本放棄做 tsit方面 ê 努力，若面模仔描寫了 siunn詳細，無定有負面效果，比論講喙唇厚，佇西方是性感--ê，毋過因為審美觀無仝，其實咱亞洲人比較 khah欣賞喙唇 khah薄寡。不管汝 kā 女主角 ê 喙唇寫厚抑是寫薄，攏有一爿 ê 人感覺無媠。所以，我會 khah希望小說家 mài 直接描寫出人物生 siánn-mih款，簡單講媠或者bái，予逐个以家己審美觀去想像主角 ê 形模，無定對作家讀家雙方攏 khah輕鬆。

今仔日佇國家攝影文化中心看著一齣記錄短片，內底攏咧講出草 ê 代誌。 客人講 in pâ in 親tsiânn 按怎予 Atayal thâi死，其中一个是本底 beh 佮原住民交易換 mih-kiānn ê 人干焦因為慢一工，結果 tsuânn 頭去 kuah去。後壁一个 Atayal leh 講 in 祖先 thâi siunn濟人，tsiah 會囝孫毋tsiânn樣，一堆酒鬼，干焦 in 祖去予客人 thâi，所以 in tau ê 囡仔 khah成材。我聽 kah tsia，驚一tiô，原住民嘛無咧信佛教，ná ē 講 tsit-lō 因果循環 ê mih-kiānn？ 後來我閣想，無定對舊約聖經來 ê 觀念，祖先做孽，牽連囝孫。 後來閣佮阿家討論著出草 ê 文化意義，佮文化 ê 隔代遺傳，總是，我理解出草有伊 ê 道理，佇資源欠缺 ê 時代，台灣先民維持一定數量人口，避免資源耗損 ê 危機，踮 tsit个開發時代，自然無可能閣維持落去。

我算無重食 ê 人，嘛毋是看 siánn-mih leh CP值，清氣siùnn 上重要。昨暗 beh 睏進前看著一篇 kā 台灣 tsia̍h食嫌 kah 無一塊著 ê 文，感覺有夠譀，是講汝人生干焦 tshun 食 hiooh？ 台灣雖然無 kah 四界攏「美食（華）」，嘛無 kah hiah 落漆啦！佇世界來排，無第一名，嘛有前十名。上厲害--ê 是品項濟，beh 西餐有西餐，beh 中餐有中餐，beh 日本料理有日本料理，其中中餐佮日本料理攏比產地差一屑仔，至少世界會使排第二坎。 閣有千變萬化 ê 素食，素食料理應該世界第一名，當然閣有台灣家己特別 ê 料理。 按呢若閣嫌，世間汝嘛揣無佗位通去--ah。 我承認，去日本 tshit-thô ê 時，bô siánn-mih 機會去踏著雷，毋過日本除了日本本地料理，佮一寡中華料理，其他國家菜色攏 oh揣，連韓國菜 tō 無濟。丼飯雖然好食，總無可能逐頓攏食 tse。 我是毋bat 佇香港蹛過，毋過嘛是有相bat ê 朋友蹛 hia ê 時嫌 kah 臭屎。 台灣「美食」 ê 特點毋是CP值懸，是選擇濟，我 bat 拄過一个外國朋友，伊上愛食傳統自助餐，會使一改揀足濟項菜是伊上佮意 ê 所在。

前幾日，阿勇佇一場頒獎會講出伊 ê 想法，伊認為袂使靠政府，頭一間台語學校上好是台語界家己來做。我會使理解伊為怎樣按呢講，毋過台語文界 ê 人並無 siánn-mih 好額人，另外一个問題是，學校設佇佗？因為眾友志蹛 ê 所在分布真曠闊。日本時代台灣幾偌位好額人出錢建成台中一中，無定先起高中比起小學 khah無所在限制。是講若無好額人認同 tsit个理念，代誌嘛真oh成。 有寡先進認為台語文運動 beh 成，嘛是 ài 靠政治力，佮阿勇 ê 想法拄好倒pîng。 可能阿勇是美國人，所以會按呢想嘛真正常，美國人好 ê 學校基本上攏是民間成立，主要是美國教會力量真大，民間力量袂比政府 khah細。 台灣 ê 社會力確實差一大睏，真濟NGO定定強beh 無米通度。 我 ê 想法是，若有法度討著政府資源，當然免客氣。毋過現此時政府確實無咧要意 tsit層代誌。 上主要是政府無感覺著民意關心著 tsit件代誌，所以講 kah 尾，問題猶原出佇台灣人對台語 kám 有愛？kám 有夠愛？kám 愛有夠？beh 按怎予台灣人愛台語，tse 是我思考 ê 問題。 講起來，實在譀，人愛無愛，是我想 tō 會變--nih？我嘛知影我是咧gōng想，可能佮我自來就干焦會曉搬痴情男 tsit步爾......，猶閣咧痟想痴情人感動天，病了無輕......