熱礱

天氣好，tō 來山頂 tshit-thô。本底想 beh 去撆天崗，m̄-koh，小15車 khah tsió，臨時決定 kàu 陽明山公園。頂 kái 來 bô定國中 ê 時陣--ah，而且，hit kái 可能是去前山公園。 一 lo̍h車，tō 看tio̍h 一欉櫻花，心花隨 khui。 因為是臨時起意，其實我 m̄知 beh 對 toh-ūi kiâⁿ，kiâⁿ 一段 bē-té ê 路，一直 bô看tio̍h khah sîng 公園 ê 所在，感覺 kiâⁿ m̄-tio̍h 路。 Kiâⁿ leh kiâⁿ，總是 kiâⁿ kàu 陽明（後山）公園。公園頭有一片大蔭，過石橋了後，來 kàu 公園主要 ê 部份，tsia 一寡花 khui 了 bē-bái。我 tsia hip hia hip，心情真好，koh ē 唱出歌，我平時 bô siáⁿ leh 唱歌 ê lâng，mā 可能我 siuⁿ久 bô 來山頂 sńg。 看 tio̍h 一對戀人 tī 櫻花 kha 相攬自 hip，我 tō bih tī in 後壁，sīng-suà kā in 美麗 ê 情影 hip--lo̍h-lâi。今á日 lâng bô tsē，溫度 koh tú-hó，真正是來 tshit-thô siōng 讚 ê 時陣。 公園中央是王陽明 ê 銅像，piⁿ-a 有溪水流過，所以溪流 piⁿ ê 步道號做「溪流哲學步道」，當然是 bô京都 ê 哲學之道闊，mā bô 伊 ê 長，m̄-koh mā bē-sái án-ne tō kóng 陽明山 ê 哲學步道 khah làu-lián。看 tio̍h 溪水流 ê 勢、聲，實在千變萬化，因為溪足細條，其實比京都 hia 看 khah清楚，我一時發覺，園林 bô需要開 siuⁿ-tsē 精神，用石頭舖底，pàng 清水流，水本身 tō ē 順勢變化非常美麗 ê 圖 kap 形體，而且，koh 清涼，我 tō kóng 有一kang 我若有 ka-tī ê 花園，mā beh pàng 一條溪流 tī 內底。 自然 ê 形勢真 súi，m̄-koh 後壁 ê 光復樓 tsiâⁿ pháiⁿ看，花鐘 mā 粗，櫻花林可能 lóng tú種，bô 幾欉花，有淡薄á pha荒。 回程 ê 時，經過草山行...

「言文一致 ê 運動本底是坪內逍遙 tsit款小說家以『小說 ê 改良』為目標，所做 ê 試驗。江戶時代 ê 小說，口白 ê 部份已經是口語（言），描寫文 suah是文言（文）。言文一致 tō是 beh kā 後面 ê 部份 mā 化做口語。當然，he beh 講是言文一致，不如講是新 ê 口語『文』 ê 創造。對 án-ne ê 前後發展線索來看，言文一致看來 ká-ná 像小說 ê 問題。m̄-koh，就算 bô án-ne 稱呼，對言文一致 ê 試驗 mā tī tsiâⁿ-tsē 位。若 bô 細膩考察，無法度理解言文一致 ê 問題，翻頭 tńg來講，透由細膩考察 tsia ê 部份，tsiah 有辦法理解小說當中言文一致問題 ê 特異性。」（柄谷行人《日本近代文學 ê 起源》第二章第二節） 原本我想講言文一致親像華語白話文運動仝款，是將本底用文言文寫 ê 文章，改用白話文寫，結果佮我想--ê 完全無仝，顛倒 khah sîng 台語對話華語說事 ê 鄉土文學向純台語文進展 ê 過程。 其實，lán tsit-má tō tng leh 言文一致運動，所以日本人 bat tú--tio̍h ê 問題應該攏 ē-sái 供 lán 參考。比論講，二葉亭四迷寫了一本小說 tō 放棄，因為伊感覺用新 ê 語文寫小說，有夠 ngāi-gio̍h，kàu 落尾，伊甘願去做翻譯，雖然伊翻譯 ê 時，其實用--ê tō是伊感覺 ngāi-gio̍h ê 新語文，m̄-koh，可能是專心翻譯 ê 時，bē ū tse 是我 ka-tī ê 作品，我 ài 負責 kàu 底 ê 心理負擔，khah 有法度大力 kā 催落去。 當然，日語 kap 台語真正 tú--tio̍h ê 困難 bô-kâng，日本人 ê 問題 kap 尊卑語 khah ū 關係，台語主要是一kuá 字詞觀念 ê 欠缺，總--是，我感覺 ta̍k-kái 研究日本文化 ê 時陣，有真濟啟發，tsiâⁿ 值得 lán 了解。

久年 bô 行踏 kàu ê 中央研究院，tsit kái 來，bô 像 khah早 hiah稀微感覺。伍碧雯教授一向攏真 gâu-kóng，今á日仝款講了真濟 mi̍h-kiāⁿ。比論講，猶太豬母（Judensau）、刻 khàm目睭 ê 查某人象徵猶太會堂、猶太人 mua 黃巾，其實我 bô特別想beh 研究猶太人 kap 反猶主義，m̄-koh，反猶主義佔德國現代史足中心 ê 位，beh了解德國 bô法度閃避。 蔡英文教授評 ê 時，引足濟 Hannah Arendt ê 看法，雖然我看過 hit本冊，細節差不多攏袂記--ah。比論講，Arendt 認為反猶主義本底 tī 德國 bô顯目，m̄是嚴重 ê 問題，tsit點我已經放袂記--ah。Koh，蔡教授講tio̍h，海德格反猶 ê 思想是 khah形上學 ê 理由，伊認為猶太人無根。海德格是一个足強調鄉土力量 ê 思想家，照 lán tsit-má 話講，伊是一个庄kha sông ê lâng。猶太人一直是國際主義 ê 代表，kap 土地關係 khah疏遠。伍教授講 tse 是因為 tī 西歐猶太人 hông 禁止做穡，tī 東歐 tō bô tsit款問題。 在我看，猶太文化 kap 德國文化，根本是雙生，ngē beh kā ùi 德國切出來，tō kap beh kā 奧地利 ùi 德國文化切出來，仝款 bô可能。 猶太人 m̄是真正無根，tng hit時，in ê 根 tō tī 德國，講德國話、讀德國冊、生活 tī 德國，甚至信德國基督教。一世人攏是德國人，tō 像為德國製造毒氣 ê Fritz Haber。像愛因斯坦 hit款反國家 ê 猶太人顛倒是少數，愛因斯坦 tō算 m̄是猶太人，仝款 ē反對德國，伊 mā bô信猶太教，甚至一開始 mā bô特別支持以色列建國。 到底，一个民族 kap 一塊土地結相連，是好抑 bái？ 羅馬史家Tacitus 認為日耳曼人 m̄-bat 離開 ka-tī ê 土地，因為 hia 足 kuâⁿ，bô好生存，mā bô-lâng ē kap in 搶。雖然 lán tsit-má tsai-iáⁿ tse 根本是神話，所有 ê 亞利安民族攏是對烏海附近 suá kah 世界各所在，日耳曼人並 bô 特別 bô-kâng，in kha...

昨昏念冊會變做元宵會，落尾 koh 變做食飯會。 因為元宵真僫買，tō 用圓仔代替。結果超級市場內底 ê 圓仔 tshun 鹹圓仔 niā-niā，足恐怖，佮衛生紙之亂有比。應該是真濟人佮阮想--ê 仝款，攏買圓仔準元宵，koh 逐个人攏 khah 愛食甜--ê，一暗 tō kā 甜圓仔掃了了。 我講，台灣人 tō是愛食甜，m̄-koh Huē-bûn 無同意，伊認為 kan-ta 南部人愛食甜，台北人 khah 愛食鹹。我細漢真正連煎餃嘛有 tsham kuá 糖，害我 kàu 台北了後，一直攏感覺食著 ê 煎餃是假--ê。 Tsit工 Ngá-tông 頭一擺參加，伊本底講伊台語 bô好，m̄-koh 我真正聽本人講，感覺伊程度 bē-bái，精差發音有 kuá小問題。伊講伊大學開始才學講，伊日語嘛是家己小學看電視卡通（khá-thong）開始學。而且 in tau ê 背景，A-pâ m̄是 Hô-ló-lâng，所以厝內 bô leh 講台語，tsiah ē 大學 tuà 阿公阿媽 tau tsiah 學講。若少年人攏有法度 tsiah緊進入狀況，台語 tō有救--ah。上重要--ê 是伊 leh 做--ê tō是我認為正港台語 ài 發展 ê 方向，台語是全部台灣人 ê 資產，m̄ sī kóng lín tau ài sī Hô-ló-lâng tsiah tō kóng 台語。