熱礱

今仔日佇國家攝影文化中心看著一齣記錄短片，內底攏咧講出草 ê 代誌。 客人講 in pâ in 親tsiânn 按怎予 Atayal thâi死，其中一个是本底 beh 佮原住民交易換 mih-kiānn ê 人干焦因為慢一工，結果 tsuânn 頭去 kuah去。後壁一个 Atayal leh 講 in 祖先 thâi siunn濟人，tsiah 會囝孫毋tsiânn樣，一堆酒鬼，干焦 in 祖去予客人 thâi，所以 in tau ê 囡仔 khah成材。我聽 kah tsia，驚一tiô，原住民嘛無咧信佛教，ná ē 講 tsit-lō 因果循環 ê mih-kiānn？ 後來我閣想，無定對舊約聖經來 ê 觀念，祖先做孽，牽連囝孫。 後來閣佮阿家討論著出草 ê 文化意義，佮文化 ê 隔代遺傳，總是，我理解出草有伊 ê 道理，佇資源欠缺 ê 時代，台灣先民維持一定數量人口，避免資源耗損 ê 危機，踮 tsit个開發時代，自然無可能閣維持落去。

我算無重食 ê 人，嘛毋是看 siánn-mih leh CP值，清氣siùnn 上重要。昨暗 beh 睏進前看著一篇 kā 台灣 tsia̍h食嫌 kah 無一塊著 ê 文，感覺有夠譀，是講汝人生干焦 tshun 食 hiooh？ 台灣雖然無 kah 四界攏「美食（華）」，嘛無 kah hiah 落漆啦！佇世界來排，無第一名，嘛有前十名。上厲害--ê 是品項濟，beh 西餐有西餐，beh 中餐有中餐，beh 日本料理有日本料理，其中中餐佮日本料理攏比產地差一屑仔，至少世界會使排第二坎。 閣有千變萬化 ê 素食，素食料理應該世界第一名，當然閣有台灣家己特別 ê 料理。 按呢若閣嫌，世間汝嘛揣無佗位通去--ah。 我承認，去日本 tshit-thô ê 時，bô siánn-mih 機會去踏著雷，毋過日本除了日本本地料理，佮一寡中華料理，其他國家菜色攏 oh揣，連韓國菜 tō 無濟。丼飯雖然好食，總無可能逐頓攏食 tse。 我是毋bat 佇香港蹛過，毋過嘛是有相bat ê 朋友蹛 hia ê 時嫌 kah 臭屎。 台灣「美食」 ê 特點毋是CP值懸，是選擇濟，我 bat 拄過一个外國朋友，伊上愛食傳統自助餐，會使一改揀足濟項菜是伊上佮意 ê 所在。

前幾日，阿勇佇一場頒獎會講出伊 ê 想法，伊認為袂使靠政府，頭一間台語學校上好是台語界家己來做。我會使理解伊為怎樣按呢講，毋過台語文界 ê 人並無 siánn-mih 好額人，另外一个問題是，學校設佇佗？因為眾友志蹛 ê 所在分布真曠闊。日本時代台灣幾偌位好額人出錢建成台中一中，無定先起高中比起小學 khah無所在限制。是講若無好額人認同 tsit个理念，代誌嘛真oh成。 有寡先進認為台語文運動 beh 成，嘛是 ài 靠政治力，佮阿勇 ê 想法拄好倒pîng。 可能阿勇是美國人，所以會按呢想嘛真正常，美國人好 ê 學校基本上攏是民間成立，主要是美國教會力量真大，民間力量袂比政府 khah細。 台灣 ê 社會力確實差一大睏，真濟NGO定定強beh 無米通度。 我 ê 想法是，若有法度討著政府資源，當然免客氣。毋過現此時政府確實無咧要意 tsit層代誌。 上主要是政府無感覺著民意關心著 tsit件代誌，所以講 kah 尾，問題猶原出佇台灣人對台語 kám 有愛？kám 有夠愛？kám 愛有夠？beh 按怎予台灣人愛台語，tse 是我思考 ê 問題。 講起來，實在譀，人愛無愛，是我想 tō 會變--nih？我嘛知影我是咧gōng想，可能佮我自來就干焦會曉搬痴情男 tsit步爾......，猶閣咧痟想痴情人感動天，病了無輕......

今仔日討論著台語書寫 ê 困難佇佗，代誌無像李小風想--ê hiah簡單。雖然頭一个印象台語佮華語語法差不多差不多，毋過我是學台語文寫台語文 kàu kah 第七年 tsiah 有法度直接順順仔寫，問題佇佗位？主要是咱自細漢學真濟華文文章 ê 寫法，其中真濟話是無可能真正華文寫台語讀。 我直接提一个例出來，像華文「晚風襲來」，雖然逐字台語攏讀會出來，若真正照字唸「buán-hong sip--lâi」，根本無人聽有，嘛毋是台語。規頭殼攏 tsit款修辭 ê 華人當然會感覺用台語寫 mi̍h-kiānn 足 kē-lōo，tse 嘛是為怎樣一直以來真濟人無法度放棄華語書寫，因為放棄華文，有真濟 mi̍h-kiānn 攏寫袂出來。人咧講 ê 台語思考，就是咧講有法度順順仔寫出台語，袂去 khê著，寫出來攏正pān ê 台語。 像 tsit句困難點佇「襲」，若轉化做台語，伊會使直接講「暗時 ê 風吹來」，嘛會使講「暗，風幔（mua）過來」。 千瑤提出一句是「奪門而出（華）」，當然汝嘛使會照漢字唸，勉強可能小可聽有，毋過無算正pān ê 台語，我第一時間想出來--ê 是「uì 門 tsông--出去」，毋過千瑤認為無夠味，「奪門」有手去掠門框 ê 動作，雖然是誇示法，確實比 tsông koh-khah hiông。 所以，語言 ê 轉換是無hiah 簡單 ê 代誌，代誌絕對毋是李小風想--ê haih簡單。

今仔日規工會使講，ká-ná 咧戰爭。下晡出門，拄鑢過捷運入口門，開始聽著警報聲，可能因為我咧行路，其實無siánn 感覺著地動，害我想講是防空演習。慌慌狂狂拼 kah 月台，衝入車內，煞攏毋動。閣來廣播通知，捷運停駛。tsit時我已經袂赴約會。 等退卡，排隊 beh 十幾分鐘，等我錢退了，出來， tō 佮朋友講，我可能 ài 坐公車去，時間會拖，看伊 kám會要緊。伊講伊已經咧看展覽，我 ta̍uh-ta̍uh-á 來，tō 好。 我查一下仔 google map，發現 ài puânn車，想著頭一段 tsiah 二站，規氣用行過去，tō 免puânn。結果，毋知是毋是因為衫無縫，人足hip，頭殼額仔一直 bū汗。愈行愈無想beh 去赴約。 拄好行 kah 一間百貨公司附近，我想規氣去內底吹冷氣歇睏。揣著一teh 椅liâu，tsua̋n 佇頂懸看冊。看幾頁了後，想講，無，來其他層踅踅咧。 踅 kah Uniqlo，想著我 beh 買一條西裝褲，tō 順紲買買咧。後來，閣買一雙鞋。出來了，行去附近全家，買一下仔啉--ê，閣小歇睏一下，看看咧，beh 五點，差不多會使食暗，就行出來，拄好佇路口影著一个影，感覺應該是我bat ê 人，就綴伊後壁，閣真正是我bat ê 人。其實我拄才無看著伊 ê 面，按呢嘛認出來，我實在有夠恐怖。 食一下暗，tńg來，發現便所淹大水。我舞規半晡，水猶是袂退，連出水口 hit个kuà 攏提起來--ah，嘛無路用，我看 he 水閣燒燒，室友應該拄落跑。毋知伊今仔日咧舞siánn，suah 淹 tsiah大 ê 水。我挖 kuà 下跤，全頭毛，頭毛攏足長，我梟疑是 in 女朋友洗頭造成。tsit-má 上恐怖是，我 kuà 攏提起來--ah，頭毛嘛挖真濟出來，水猶袂退，看起來明仔載可能 ài 叫水電--ê 來修理Orz

 我以前國中 ê 時，攏用 la-jí-ooh 聽古典音樂，老實講，音質無可能好，毋過我嘛聽了足歡喜。hit時，電台節目 ê 教授解sueh 正pān ê 古典派其實無要求音質，音質是浪漫時代 tsiah 開始追求。 伊閣講，khah 重要是 hit-lō 音樂性。tō 像戲劇重要是佇伊 ê 戲劇性。無，汝想，khah早物質文明 hiah落伍，若 siunn要求幼質，真濟藝術攏做袂起來。 我想可能我 ê 五官 khah古早人，所以我對小可精差，袂 hiah敏感。 是講時代確實進步--ah，人會去要求 tsit款工幼無幼嘛袂使講無合理，標準佮觀念 ê 問題。我是古典派，可能 siunn 好飼啦。