熱礱

今仔日討論著台語書寫 ê 困難佇佗，代誌無像李小風想--ê hiah簡單。雖然頭一个印象台語佮華語語法差不多差不多，毋過我是學台語文寫台語文 kàu kah 第七年 tsiah 有法度直接順順仔寫，問題佇佗位？主要是咱自細漢學真濟華文文章 ê 寫法，其中真濟話是無可能真正華文寫台語讀。 我直接提一个例出來，像華文「晚風襲來」，雖然逐字台語攏讀會出來，若真正照字唸「buán-hong sip--lâi」，根本無人聽有，嘛毋是台語。規頭殼攏 tsit款修辭 ê 華人當然會感覺用台語寫 mi̍h-kiānn 足 kē-lōo，tse 嘛是為怎樣一直以來真濟人無法度放棄華語書寫，因為放棄華文，有真濟 mi̍h-kiānn 攏寫袂出來。人咧講 ê 台語思考，就是咧講有法度順順仔寫出台語，袂去 khê著，寫出來攏正pān ê 台語。 像 tsit句困難點佇「襲」，若轉化做台語，伊會使直接講「暗時 ê 風吹來」，嘛會使講「暗，風幔（mua）過來」。 千瑤提出一句是「奪門而出（華）」，當然汝嘛使會照漢字唸，勉強可能小可聽有，毋過無算正pān ê 台語，我第一時間想出來--ê 是「uì 門 tsông--出去」，毋過千瑤認為無夠味，「奪門」有手去掠門框 ê 動作，雖然是誇示法，確實比 tsông koh-khah hiông。 所以，語言 ê 轉換是無hiah 簡單 ê 代誌，代誌絕對毋是李小風想--ê haih簡單。

今仔日規工會使講，ká-ná 咧戰爭。下晡出門，拄鑢過捷運入口門，開始聽著警報聲，可能因為我咧行路，其實無siánn 感覺著地動，害我想講是防空演習。慌慌狂狂拼 kah 月台，衝入車內，煞攏毋動。閣來廣播通知，捷運停駛。tsit時我已經袂赴約會。 等退卡，排隊 beh 十幾分鐘，等我錢退了，出來， tō 佮朋友講，我可能 ài 坐公車去，時間會拖，看伊 kám會要緊。伊講伊已經咧看展覽，我 ta̍uh-ta̍uh-á 來，tō 好。 我查一下仔 google map，發現 ài puânn車，想著頭一段 tsiah 二站，規氣用行過去，tō 免puânn。結果，毋知是毋是因為衫無縫，人足hip，頭殼額仔一直 bū汗。愈行愈無想beh 去赴約。 拄好行 kah 一間百貨公司附近，我想規氣去內底吹冷氣歇睏。揣著一teh 椅liâu，tsua̋n 佇頂懸看冊。看幾頁了後，想講，無，來其他層踅踅咧。 踅 kah Uniqlo，想著我 beh 買一條西裝褲，tō 順紲買買咧。後來，閣買一雙鞋。出來了，行去附近全家，買一下仔啉--ê，閣小歇睏一下，看看咧，beh 五點，差不多會使食暗，就行出來，拄好佇路口影著一个影，感覺應該是我bat ê 人，就綴伊後壁，閣真正是我bat ê 人。其實我拄才無看著伊 ê 面，按呢嘛認出來，我實在有夠恐怖。 食一下暗，tńg來，發現便所淹大水。我舞規半晡，水猶是袂退，連出水口 hit个kuà 攏提起來--ah，嘛無路用，我看 he 水閣燒燒，室友應該拄落跑。毋知伊今仔日咧舞siánn，suah 淹 tsiah大 ê 水。我挖 kuà 下跤，全頭毛，頭毛攏足長，我梟疑是 in 女朋友洗頭造成。tsit-má 上恐怖是，我 kuà 攏提起來--ah，頭毛嘛挖真濟出來，水猶袂退，看起來明仔載可能 ài 叫水電--ê 來修理Orz

 我以前國中 ê 時，攏用 la-jí-ooh 聽古典音樂，老實講，音質無可能好，毋過我嘛聽了足歡喜。hit時，電台節目 ê 教授解sueh 正pān ê 古典派其實無要求音質，音質是浪漫時代 tsiah 開始追求。 伊閣講，khah 重要是 hit-lō 音樂性。tō 像戲劇重要是佇伊 ê 戲劇性。無，汝想，khah早物質文明 hiah落伍，若 siunn要求幼質，真濟藝術攏做袂起來。 我想可能我 ê 五官 khah古早人，所以我對小可精差，袂 hiah敏感。 是講時代確實進步--ah，人會去要求 tsit款工幼無幼嘛袂使講無合理，標準佮觀念 ê 問題。我是古典派，可能 siunn 好飼啦。

今仔日討論幾个台語詞。千瑤講，做食--ê 流行 kā 「挲草」用來當做今仔日真無閒 ê 同義詞，tō 算講話是華語人入 tsit途--ê 攏知影 so-tsháu tsit个詞，雖然 in 可能根本袂曉台語，嘛毋知影 so-tsháu 原本是咧講挽草。 柏綱感覺「阿舍」無成台語原生詞，伊認為應該是外來語，我講，以我真淺 ê 日語知識，日語內底應該是無 tsit个詞。我是知影香港人有咧講「阿sir」，毋過講香港人去影響著台灣人，可能性無懸。所以到底「阿舍」對佗來？我想著日語有「田舎（いなか）」 tsit个講法，毋過伊毋是漢語詞，若 ngē 牽，有可能是講著「田僑仔」 ê 時，為著 kā gé-，就用「阿舍」來代替。柏綱感覺有淡薄仔道理，我講，毋過，其實 tse是我烏白想--ê，無證據。 像有人講 siánn-mih a-sa-puh-luh 是 siánn-mih 日語早起洗身軀 ê 朝風呂，我感覺根本就是 a-sa-puh-luh ê 講法。有寡詞本底 tō 是源頭詞，汝 ngē beh 問伊對佗來，根本無意義。無，查甫為怎樣叫做查甫？pha-tái為怎樣叫做pha-tái？a-lí-put-ta̍t為怎樣叫 a-lí-put-ta̍t？ 上落尾討論著a-su-pah-lah，柏綱問 a-su-pah-lah ê 來源，我講干焦知影 a-su-pah-lah 佇日語是蘆筍 ê 意思，柏綱講 in 攏用來講人 nńg-kauh-kauh，結果講去著以前 bat出一種提神飲料號做 a-su-pah-lah，有可能是按呢來--ê。 總講一句，詞源學有時真正是咧畫hóo-lān，上好是揣有啦！

siánn-mih 怪論攏有人會講，美國有專家認為台灣控制半導體顛倒會 khah有機會去予中國拍，佮su-lí-khóng盾牌（silicon shield） ê 講法顛倒páinn，tse 是輕忽戰爭造成 ê 破壞。若準講中國真正拍台灣，除非伊足精準打擊，無，飛彈偏去，拍著台積電 ê 工場嘛無意外，尤其台灣是一个都市化足深 ê 所在，就算汝避過台積電，嘛是可能拍著伊 ê 包商，一場戰爭落來，汝提著 ê 台灣可能已經無去半導體霸權--ah，m̄-nā 機台，人員 ê 損失嘛真歹講，尤其台積電伊 ê 製造知識是分散式，死--ê 超過一个數量，台積電 tō 毋是台積電--ah。 所以，現實來講，就算全世界無因為台灣佇半導體頂懸 ê 重要性，來保護台灣，干焦台灣拍爛，半導體產業仝時爛去一層代誌 tō 會使使中國 beh 拍台灣 ài tsiâu 思考，除非中國有世界第二強 ê 半導體產業。若中國有世界第二強 ê 半導體產業，kā 第一強拍倒，伊自然是世界第一強，佇 tsit款情形上，su-lí-khóng盾牌可能會失效。 美國至少 ài 維持世界第二強 ê 半導體產業，按呢 su-lí-khóng盾牌 tsiah有法度繼續發揮伊 ê 作用。