熱礱

我騎車 kàu 西子灣，路--nih，看tio̍h 一棟洋樓，頂懸寫伊是英國領事館。喔！原來佇 tsia！我繼續騎 kàu 海邊，佇西子灣邊á ê 路，khau beh 半輪，揣tio̍h 一个位，kā 車停leh。 看一寡人行石梯起lih，m̄-tsai 去佗位，m̄-koh，我時間濟，tō 綴leh 行。行無guā久，看tio̍h 一間廟，普通普通。tng beh ua̍t頭，tsiah 發現正手爿是英國領事館。咦！山頂山跤攏是領事館？！我看市民票半價，tō án-ne 入 kah 內底。 真久以前，iá-buē 收票 ê 時代，我應該 bat 來過，而且印象中，hit kái a-pa ká-ná mā來，án-ne 真正足久足久以前--ah。 我徛佇紅樓厝前空地，ǹg 海 hit爿看，兩 tsuā 防波堤，ká-ná 目眉，中ng 一个喙，眉目長 koh 幼，拄好下晡光線媠，翕落去，不止仔迷人。 我 tsia 翕，hia 翕，tsia 行，hia 行，ta̍k位攏人，可能平時來 khah清悠，其實我今á日本底 mā bô phah-sǹg beh來。是kóng 先來認一ē 路 mā bē-bái。我原本想 beh 去旗津騎車，ùi 旗津頭騎 kàu 旗津尾，可惜今仔日節日，渡船頭全人，只好斷念，等另日人 khah tsió ê 時，tsiah 來去。 英國領事館 bô大，m̄-koh 淡薄sîng 淡水，攏佇視野 siōng讚 ê 所在起。淡水 ê 紅毛城當初 mā是英國 ê 領事館，英國人真gâu kíng，應該 kóng hit時英國人勢力真大，ē-sái kíng siōng好 ê 點。 原來，山頂 kap 山跤中ng 有一條石梯路相通，山頂是領事蹛 ê 位，山跤 tsiah是真正 ê 領事館，領事館本身 koh khah 細間。行 bô 二三步 tō kàu 底--ah。 介紹牌á 有 kóng-tio̍h 郇和 kap 馬雅各簡單 ê 故事。佇馬雅各 ê 介紹牌 ê 頭前有一个導覽，伊解釋塗跤玻璃枋下跤有柱仔座，為siáⁿ-mih m̄恢復原來建築。照伊 ê 講法，雖然有設計圖，m̄-koh，lán m̄-tsai 伊原底真正 ê 形，伊 kóng kah 真斟酌，我臆可能設計圖畫了真簡單。 伊 koh kóng...