基督教化 kap 現代化

知iáⁿ 日本明治維新有一陣志士信仰基督教了後，想tio̍h 韓國現此時 mā tng-leh 基督教化，án-ne 全世界 ê 現代化國家，kan-ta tshun 台灣是唯一 m̄-bat 基督教化--ê，m̄-koh bô-tiāⁿ ū-lâng ē 認為台灣根本 iá-bē 現代化。

台灣到底是怎樣情形，lán 先 khǹg 一爿。準講基督教化 kap 現代化確實有關係，tse 其中是 siáⁿ-mih 原理？

Lán 知iáⁿ 現代化有幾个特徵，第一是精準時間觀，第二是可計算性，第三是計劃性。基本上，全部加起來，ē-sái 用「合理性」來概括。若 beh 精確解說，現代社會時間是有限、有價，時間本身 ē 產生價值，所以時間 ài 儉儉á 用，ài 計算過，ài 做計劃，將 lâng 一生 ê 時間好好利用。Tsit 種精神貫徹落去，tō 變做 Max Weber kóng--ê，資本主義社會，伊 tō 認為資本主義是因為新教倫理所造成。

Lán ē-sái 用佛教來對照，若汝是佛教徒，因為輪迴 ê 關係，汝 m̄-nā tsit生，汝有千千萬萬个人生，等於講汝 ê 時間是無限--ê，所以無理由 kap 時間當做有限、有價，bô需要時時計較。

若汝是伊斯蘭教徒，in ê 教主本底是生理lâng，加上 in mā是 bô輪迴觀，照理講，kap 基督教足 sîng。m̄-koh tī 現代化 ê 路程一直行了比東亞 koh-khah tîng-tâⁿ。政教合一是其中問題，m̄-koh tú開始 ê 時，基督教國家 mā kâng款有政教衝突 ê 問題，精差基督教教會 kap 國家是兩套制度，tsit點伊斯蘭國家 khah bô-kâng，in ê 教會 kap 國家分bē 出來，當初穆罕默德本身 tō是伊斯蘭國家 ê 元首，bô 像基督教是「恁著將該撒 ê mi̍h 納 hō͘ 該撒；將上帝 ê mi̍h 納 hō͘ 上帝」。

所以講，基督教將信仰 ê 事 kap 世俗 ê tāi-tsì 分開 mā 有利現代化，因為若信仰 kap 世俗 lām 做伙，二个目標會衝突，án-ne tō bô-huat-tō͘ 計算。

雖然 lán bô-huat-tō͘  kóng 現代化一定 ài 先基督教化，m̄-koh 確實基督教化有有利現代化 ê 所在，beh 現代化，先基督教化可能會 khah 順事，其實 koh有 thang 討論，但是 tsia siuⁿ e̍h，有機會 lán tsiah koh 來詳細研究。