言文一致

「言文一致 ê 運動本底是坪內逍遙 tsit款小說家以『小說 ê 改良』為目標，所做 ê 試驗。江戶時代 ê 小說，口白 ê 部份已經是口語（言），描寫文 suah是文言（文）。言文一致 tō是 beh kā 後面 ê 部份 mā 化做口語。當然，he beh 講是言文一致，不如講是新 ê 口語『文』 ê 創造。對 án-ne ê 前後發展線索來看，言文一致看來 ká-ná 像小說 ê 問題。m̄-koh，就算 bô án-ne 稱呼，對言文一致 ê 試驗 mā tī tsiâⁿ-tsē 位。若 bô 細膩考察，無法度理解言文一致 ê 問題，翻頭 tńg來講，透由細膩考察 tsia ê 部份，tsiah 有辦法理解小說當中言文一致問題 ê 特異性。」（柄谷行人《日本近代文學 ê 起源》第二章第二節）

原本我想講言文一致親像華語白話文運動仝款，是將本底用文言文寫 ê 文章，改用白話文寫，結果佮我想--ê 完全無仝，顛倒 khah sîng 台語對話華語說事 ê 鄉土文學向純台語文進展 ê 過程。

其實，lán tsit-má tō tng leh 言文一致運動，所以日本人 bat tú--tio̍h ê 問題應該攏 ē-sái 供 lán 參考。比論講，二葉亭四迷寫了一本小說 tō 放棄，因為伊感覺用新 ê 語文寫小說，有夠 ngāi-gio̍h，kàu 落尾，伊甘願去做翻譯，雖然伊翻譯 ê 時，其實用--ê tō是伊感覺 ngāi-gio̍h ê 新語文，m̄-koh，可能是專心翻譯 ê 時，bē ū tse 是我 ka-tī ê 作品，我 ài 負責 kàu 底 ê 心理負擔，khah 有法度大力 kā 催落去。

當然，日語 kap 台語真正 tú--tio̍h ê 困難 bô-kâng，日本人 ê 問題 kap 尊卑語 khah ū 關係，台語主要是一kuá 字詞觀念 ê 欠缺，總--是，我感覺 ta̍k-kái 研究日本文化 ê 時陣，有真濟啟發，tsiâⁿ 值得 lán 了解。